Izizalwane zeZimbabwe ezisebenza kweleSouth Africa zithi ukugunyulwa imisebenzi kwezinkulungwane zezizalwane zeZimbabwe sekubathwalise amagabha avuzayo njengoba lokhu sekusitsho ukuthi zonke indingeko zempilo yezihlobo zabo eziseZimbabwe sezisemahlombe abo.
AbeZimbabwe laba bakhuthaza umongameli Mugabe ukuthi asebenzise amandla akhe ukumisa lesi sigumula ngesikhathi iphalamende iphakathi kokwesulwa kwemithetho ebangele linhlekelele yokuxotshwa kwezisebenzi mahlayana.
AbeZimbabwe laba bathi bakhathazeke kakhulu ngokugunyulwa kwezinkulungwane zabantu emisebenzini yabo eZimbabwe. Bathi okuthelela ulaka yikuthi amankampani lawo athola izigidigidi zamadola esebenzima labo bantu lamhlanje asebelahlelwa iganga.
Isizalwane seZimbabwe uMnumnzana Washy Mabizela uthi lokhu okwenzakalayo kutshiye ubuhlungu obedlula obomhelo elizweni jikelele.
UMnumzana Farai Chibaya yena uthi okuzwisa ubuhlungu yikuthi kulezinye imuli ezivele zingelazihlobo emazweni okokuthi nxa bengasatshontshanga bazakufa ngendlala.
Kodwa uMabizela uthi labo sebezathwala amagabha avuzayo njengoba sekusitsho ukuthi indingeko zonke zemuli eziseZimbabwe sezisemahlombe abo ngapha emazweni.
Ngakwelinye icele mnumnzana Chibaya ukhuthaza umongameli welizwe ukuthi angameleli ukuthi iphalamende ize ipasise umthetho wokwenqabela izigumula lezi ethi ngoba lokho kuzathatha isikhathi eside.
Uthi umongameli kufanele asebenzise amandla akhe ukwethula isinqumo sokuthi kungasabi lenkampani egumula umuntu mahlayana.
Umnumnzana Mabizela uthi umbuzo omkhulu asebelawo yikuthi izabakhona yini imisebenzi ezinkulungwane ezimbili abayithenjiswa nguhulumende nxa laleyo emilutshwana ebivele eikhona isibhidlizwanje ngabomo.
Ingcwethi endabeni zemisebenzi zithi sebesedlula izinkulungwane ezimbili abantu asebexotshiwe umsebenzi ngemva kwesinqumo sedale le Supreme court esathi umqatshi ulelungelo lokwazisa isisebenzi sakhe ukuthi umsebenzi usuphelile sekuselenje inyanga ezintathu ukuthi lowo msebenzi uphele.
Kusenjalo, inhlanganiso ezilwela amalungelo oluntu zithi ukulahlekelwa yimisebenzi lokhu kwenza impilo ibe lukhuni ikakhulu kwabesifazana njengoba inengi lixotshwa ezitaladini nxa lizama ukuthengisa impahla ezitshiyeneyo.
Asizweni amazwi kaNkosazana Grace Mathe, isiphathamandla sogatsha olulwela amalungelo abesifazana kunhlanganiso ye Zimbabwe Congress of Trade Unions, ekhuluma ngaloludaba.