Izakhamizi zemzini ye Iminyela, Mabuthweni le Makokoba zithi izithembiso zogatsha olubona ngokubuswa kwezabelo ukuthi zizakwakhelwa izindlu ezintsha yingxoxo nje yokuqhuba isikhathi ephalamende ngoba lezi zithembiso zijwayelekile kodwa kungelalutho olwenziwayo.
Ugatsha lokubuswa kwezabelo lumelwe nguMnumzana Ziyambi Ziyambi, obemele umphathintambo uMnumzana Ignatious Chombo, utshele idale lephalamende ukuthi kulohlelo olubizwa ngokuthi yi Urban Renewal lapho okuzadilizwa izindlu ezikumalokitshi la ezingalungelanga ukuhlalwa ngabantu.
Uzulu wakulezi ndawo uhlala kuzimuli ezingambili ngantathu endlini eyodwa njalo imuli ezingamatshumi amane zisebenzisa isambuzi esisodwa.
Izakhamizi zakulindawo, inengi eselikhulile, zithi vele umlomo kawugcwalelwa mfula, uhulumende uhlezi ethembisa ukuguqula impilo zazo kodwa nanku sekwedlule iminyaka engaphezu kwamatshumi amathathu belokhu behlezi kakubi.
Umnumzana Herbert Phiri, ohlala e-Iminyela uthi akusela mpahla esebenza kuhle kulindawo, impompi ziyavuza, izambuzi azisebenzi njalo konke lokhu vele uhulumende ukwazi mhlophe.
Uthi bayazixoxela nje ephalamende kodwa bona abaphila lapha yibo abalwazi beluqeda udubo lwabo ngoba bahlezi phakathi kwalo nsukuzonke.
UGogo Margret Sibanda oleminyaka engamatshumi ayisikhombisa lasikhombisa-77 uthi selokhu watshiywa ngumkakhe okunguye owayenikwe indlu eMabuthweni yikhansili, eselijaha eliqinileyo, impilo yakhe ayikhwabitheki. Uthi wahlaliswa lenye imuli ikhansili isithi izamakhela eyakhe indlu kodwa lalamhla ulokhu emelele ngapha ebhadala imali ekhansilini nyanga zonke.
Osakhulayo, uNkosazana Thandi Maseko, uthi lanxa umumo lo ungcono kwabasakhulayo kulakwasebekhulile, kunzima ukuhlala endaweni lapho okungelamfihlo ngoba yonke into yakhe isenzelwa emehlweni abantu.
UMaseko uthi yena uhlala yedwa ekamelweni lakhe ngoba abazali bakhe sebabhubha bamtshiya lapha kodwa kulabanye abahlala bebathathu bebane ngakamelo linye.
Amalokitshi la ngamanye amadala edolobheni lakoBulawayo ayeyakhelwe ukuhlalisa amadoda ayezosebenza koBulawayo etshiye imuli emaphandleni ilizwe lingakatholi uzibuse. Lanxa nje ilizwe selileminyaka engamatshumi amathathu lane, impilo ayithuthukanga lakancane, ikakhulu kuzakhamizi zakulindawo lemuli zazo, ngenxa yokungagcwalisi izithembiso kukahulumende.