Owake wadlala umdlalo weAmerican football uOrenthal James Simpson owaziwa kakhulu ngokuthi nguO. J Simpson kasekho.
Umdeni wakhe wethule umbiko enkundleni yokuxhumana eyeX ngoLwesine lapho abaveze ukuba ubulewe yisifo semvukuzane. UO. J. Simpson wake wetheswa icala lolubulala owayengumkakhe uNicole Brown Simpson lomngane wakhe uRonald Goldman ngomnyaka ka1994.
Amapholisa athi wabagwaza ngengqamu. Kodwa watholakala engelacala. Ngokuyakwesikhathi umdeni kaNicole Brown Simpson loGoldman waphanyeka udaba lolu emthethwandaba weCivil Court lapho ahlawuliswa izigidi ezingamatshumi amathathu lengxenye zamadollar eMelika – 33.5 million United States Dollars.
Engakabotshelwa icala leli, wabaleka ngemota wagijinyiswa ngamapholisa okwesikhathi esidi okwabukelwa kumabonakude ngabantu abafika phose izigidi ezilikhulu – 95 million.
Wake watholakala elamacala okuthumba lokuthatha ngenkani impahla yabanye abantu wagwetshwa ukuba ahlale entilongweni okweminyaka phose elitshumi. Waphuma entilongweni esithi uyagula. UO. J. Simpison owayengumlingisi olodumo wadlalela amaqembu omdlalo weAmerican football agoqela eleSan Francisco 49ers lele Buffalo Bills.
Forum