Obecula umdumo wembaqanga kweleSouth Africa njalo engumlibazisi uMnu Vusi Ximba kasekho.
UMnu Ximba ubhubhele emzini wakhe eSwayimane duzane lePietermaritzburg, Kwazulu Natal ngoLwesithathu.
Umuyi utshone langa linye lomunye njalo umculi obedumile uSphiwe Khanyile obehlabela leqembu leAvante. Isehlakalo lesi sitshiye isizwe seSouth sidabukile.
UXimba ubesaziwa kakhulu ngokuhlabela ingoma eziqumbaqumbayo uzulu abulawe zimbambo ngokuhleka. Kodwa ezinye zazo bezingemukelwa kuhle ngabanengi ngoba ziseyisa kumbe ukuthuka abesifazane.
UXimba, yena obeseleminyaka edlula amatshumi ayisikhombisa uphume eminyakeni edluleyo wazisa umphakathi ukuthi ubephila legcikwane lengulaza.
Umhlabeleli odumileyo njalo eyimbongi, uMnu Mzwakhe Mbuli utshele iStudio 7 ukuba uXimba uzabekwa ngempelaviki. UMbuli wengeze wathi abahlabeleli kanye lozulu jikelele babuhlungu ngokutshona kukaXimba.
Enye yengoma zakhe ebithandwa kakhulu ngethi 'Indoda ethand’ inyama.' Ungayibona iDVD yalingoma linsizwa engumathandinyama sididizela eziko, uyahleka ubulawe zimbambo.
Kulenye njalo eyomlizane ophicwa yisingisi othi nxa ebuzwa yonk’ into amane athi ‘Yes Mesis.’ UMnu Ximba ubethandwa ngitsho lasemazweni afana leZimbabwe kanye leBotswana. Lala ngokuthula Ximba!
