Idale likamantshi eKezi ngoMvulo lilahle icala lezakhamizi ezingamatshumi amabili lasithupha ezadilizelwa imizi zathathelwa lamasimu ezibotshwe zitshengisela enkambeni yamapholisa eMaphisa ngomnyaka ophelileyo.
Umantshi uthe bekungelabufakazi obugcweleyo obuveza sobala ukuba batshengisele okungekho emthethweni.
UMantshi weKezi, uMnumzana Jimmy Ntonga, uthe izakhamizi azilacala elazidalayo ngokutshengisela ngakho-ke kumele zikhululwe.
UNtonga uphinde wathi ubufakazi obethulwe edale abukhombisi ukuba izibotshwa zatshengisela okungekho emthethweni njalo lengoma ababeyihlabela ayibophisi ngoba lamapholisa abacalayo abayazi ukuthi itshoni.
“Lamagwaliba ababelawo awephuli lungelo loluntu ngakho akusizi ukuthi idale liqhubeke ngecala leli. Kungaleso sizatho lokuthi abafakazi ababalisa uDube Levy, uChopper Chaster, uHebert Madyise loEzekiel Nyungu bebephikisana ngobufakazi ababuphe edale.”
UMnunzana Prince Bhutshe-Dube, oweMathonsi Ncube Law Chambers, nguye obemele izibotshwa lezi.
UMtshutshisi bekunguMnumnzana Tafireyi Smart ovumileyo ukuba ngempela icala likhanya lingekho.
Izakhamizi zeMahetshe, eQinisela kanye le Zwehamba eMaphisa ezigoqela uSenator Sithembile Mlotshwa, uMember Ndlovu, uDugmond Munzeyi, uBishop Dube, uDouglas Ngwenya, uAlvet Nsingo, uGift Nsingo, uNathaniel Maduna, uNosizo Ndlovu, uJuliana Ncube labanye, zibikwa ukuba zatshengisele mhlaka 23 Mpandula bethwele amagwaliba abhalwe ukuthi:
‘Abantwana beBhalagwe bahlupheka’, ‘Police stop killing us we want our land’, ‘Chinyayi must go sifuna umhlabathi wethu’, lokunye okunengi nengi.
Amapholisa athesa icala izakhamizi ngokutshengisela esithi kuletha ukuxokozela kanye lokudala inzondo kuARDA leTREK kanye lamapholisa ngoba behlukanisa imihlobo phakathi kwabesiShona lamaNdebele.
UMnumnzana Elvis Ncube, uthi balokudana kakhulu noma icala lilahliwe sebephila njengayizolo ngenxa yokuthi akusakhanyi abakuphilelayo.
UNcube uphinde wathu bacela ukuhlawulwa impahla yabo edilizwe nguhulumende ngesikhathi bebathathela umhlabathi.
Izakhamizi ezadilizelwa imizi zithi zikhangelele ukuphanyeka udaba lwazo emthethwandaba waphezulu ukuze uhulumende lenkampani yeTrek ibahlawule impahla yabo.
