Udlela evalweni umqeqetshi weqembu leHighlanders uKelvin Kaindu phambilini komdlalo weqembu lakhe leleBulawayo Chiefs kusasa enkundleni yeBarbourfields.
UKaindu utshele intathelizindaba zemidlalo ukuba kunzima ukudlala leqembu labomakhelwane.
“Ngumdlalo phakathi kwamaqembu aphuma edolobheni linye njalo imdlalo enje kayikho lula. Mhlawumbe isitha sethu esikhulu sekungaba yikudelela kodwa nxa singakuvikela lokho sidlale ngendlela esilungiselele ngayo singaphuma siphethe impumela enhle,” kutsho uKaindu.
Lumdlalo uyaqhutshelwa enkundleni yeBarbourfields kodwa iqembu leBulawayo Chiefs yilo eliyabe lingekhaya.
UKaindu uthi kuyabe kufana nje lokuthi bayabe kuyibo iqembu elidlala lingekhaya.
“Kusekhaya lethu laphana njalo siyabe sidlala singekhaya loba nje siyabe singelawo amalungelo abuya lokuba liqembu elidlala lingekhaya. Okusalayo kodwa yinkundla esivele siyijwayele.
Sileqiniso njalo lokuba inengi labalandeli elizabuya lizobukela umdlalo kuyabe kungabasekeli bethu, okuyinto esibeka esimeni esihle njengeqembu,” kutsho uKaindu.
Imidlalo yeviki lesibili eyesigaba seCastle Lager Premier Soccer League iqale namhla lapho iqembu leSimba Bhora libe ngutshiki lobhanqa 1 ka 1 leGreen Fuel ngaseWadzanai Stadium eShamva, ohlohlele iSimba Bhora nguWalter Musona kuthi ohlohlele iGreen Fuel nguDonald Ngoma.
Iqembu leTelOne libhaxabule eleManica Diamonds nge 3 ka 1 ngaseBata njalo abahlohlele iqembu leTelOne nguPolyster Shoko, Blessing Sibanda kanye loFrankson Bushiri.
Iqembu eliphethe isicoco seligi eleNgezi Platinum Stars linqotshwe nge 2 ka nya ngele FC Platinum ngaseBaobab njalo ohlohlele iqembu leFC Platinum nguWilfred Muvirimi.
NgaseLuveve iChicken Inn le Arenel Movers zibe ngutshiki lobhanqa 0 ka 0, iHerentals itshaywe 2 ka nya yi Caps United ngaseNyamhunga njalo abahlohlele iqembu leMakepekepe nguRalph Kawondera kanye loRodwell Chinyengetere.
NgaseBarbourfields iqembu leDynamos libe ngutshiki lobhanqa 2 ka 2 leHwange njalo abahlohlele eleDeMbare nguDonald Mudadi kanye loEmmanuel Paga ikanti uMarceline Mlilo nguye ohlohle elinye lamagoli eChipangano kwathi elinye lakhona imvimbi yeDynamos uDonald Dvinyai uhlohle ekhaya.
Komunye umdlalo ozadlalwa kusasa iqembu leChegutu Pirates lizadlala leleZPC Kariba ngaseBaobab.
Forum