Bankeme imilomo abalandeli bomdlalo wenguqu ngemva kokuba amaqembu athi ele Highlanders lele Dynamos ekhethwe ukuthi azadibana kuviki yakuqala yemidlalo yesigaba seCastle Lager Premier Soccer League.
Owadlalela amaqembu abalisa eleZimbabwe Saints kanye leBulawayo Arsenal uBlessing Lunga uthi inkokheli zomdlalo wenguqu elizweni aluba ziyadlulisela phambili umdlalo okumele ube phakathi kweBosso leDeMbare ngosuku lwakuqala lwemidlalo.
“Umdlalo lwana vele kawenzi ukuba ube ngowokuqala ngoba siyazi sonke ukuthi kuvele kulokulwa phakathi kwamaqembu lawa womabili. Bekumele mhlawumbe ibe ngeyesibili loba eyesithathu ngoba ingavele iqale sekungenzeka sisale singasela inkundla yeBarbourfields thina sivele sikhala ngokuthi akula nkundla elizweni,” kutsho uLunga.
Intathelizindaba yezemidlalo uNash Mkokwayarira yena uthi akayesabeli ukuba kungaba lobudlwangudlwangu ngosuku lwakuqala olwemidlalo loba nje kuyabe kudibene amaqembu ayazakala eyingwe lenja.
“Sijwayele ukuthi kweminye imidlalo kucine kube lobudlwangudlwangu phakathi kweHighlanders kanye leDynamos ikakhulu nxa kuleyinye eyabe ingani isinqotshwa. Ngibona angani njengoba lowu usekuqaliseni abalandeli bazazwisisa ukuba kusasemasinya okokuthi loba yiphi impumela eyabe itholakele iyabe ingaphi isimo esiqotho esokuba iqembu limi njani lonyaka,” kutsho u-Mkokwayarira
Umlandeli weqembu leHighlanders uMthokozisi Mkhwebu yena uthi yena akala nsolo phezu kohlelo lokuba amaqembu adlale njani.
“Kuzakuba khona ubunzima vele obuzabhekana lamaqembu womabili kodwa kuzamele kudlalwe njengoba kuvele sekuhleliwe njalo abadlali labaqeqetshi kuzamele bazilungiselele kikho konke ngoba akusabuyeleki emuva, ibhola kalidlalwe,” kutsho u-Mkhwebu.
Ocubungula ezemidlalo eselizweni laseNgilandi uRicky Zililo uthi imidlalo yalonyaka ithembisa ukuba izachaza abalandeli kodwa abeqembu leHighlanders kumele bakwamukele ukuba lonyaka bayabe besakha kakutsha.
“Ngibona angani leyi ekaMatshobana isenkingeni kodwa khonokho ukuba abanengi bakhangelele ukuba izadonsa nzima sekungabasebenzela. Bona abamele bakwenze yikuba batshele abalandeli babo ukuba lonyaka bazabe bebumba kutsha iqembu labo kodwa iqiniso elikhona yikuba leyo oyokwala iqembu lilokhu lisakha kutsha kayikho ebholeni lezinga laphezulu,” kutsho u-Zililo.
Imidlalo yeligi ikhangelelwe ukuqala ngenyanga kaMabasa kodwa imidlalo yalonyaka izaqala okusemthethweni mhla zingamatshumi amabili lane lapho iqembu eliphakamise isicoco seligi nyakenye eleNgezi Platinum Stars elizangqikilana khona leleDynamos lona eliphakamise inkezo yeChibuku nyakenye kubangwa inkezo yeCastle Challenge Cup.
Lumdlalo uzaqhutshelwa enkundleni yeBaobab.
Forum