Iqembu labesilisa elimela ilizwe leZimbabwe emdlalweni wenguqu elamaWarriors lithole umklomelo walo wesibili kumkhankaso owokudinga amaqembu azakuyaphatheka kumncintiswano wezizwe zomhlaba ngomnyaka ka2026.
Libe ngutshiki lobhanqa 1 ka 1 leleNigeria emdlalweni oqhutshelwe enkundleni yeHuye elizweni leRwanda ngeSonto emini.
Ohlohlele iqembu leZimbabwe nguKnowledge Musona ngehlandla lakuqala elomdlalo kuthi eleNigeria lilinganiselwe nguKelechi Iheanacho ngehlandla lesibili lomdlalo.
Limpumela itshiye womabili lawamaqembu elemiklomelo emibili iqembu ngalinye njengoba eleZimbabwe libe ngutshiki lobhanqa 0 ka 0 leleRwanda emdlalweni walo wakuqala kuthi eleNigeria lona libe ngutshiki lobhanqa 1 ka 1 leleLesotho ngosuku lwakuqala olomkhankaso.
IZimbabwe leNigeria zikusibaya sikaGroup C ndawonye leBenin, Lesotho, Rwanda kanye leSouth Africa.
Iqembu elizaphutsha imidlalo lihlezi phezu kwengalane yilo elizahle lithole ilungelo elokuyadlala kumncintiswano wezizwe zomhlaba ozaqoqwa ngamazwe abalisa eleCanada, Mexico kanye leUnited States ngomnyaka ka2026.
Iqembu leSouth Africa yilo elihlezi phezu kwengalane ngemva kokunqoba elikwenze eleBenin nge 2 ka 1 ngoMgqibelo.
NgoLwesibili iqembu leLesotho lizadlala leleBenin kuthi eleRwanda lizadlala leleSouth Africa.
Kolunye udaba olumayelana lomdlalo wenguqu, bekulemidlalo emibili namhla eyesigaba seCastle Lager Premier Soccer League yona ephele kanje; iqembu leManica Diamonds linqobe eleHighlanders nge 2 ka nya ngaseGibbo kuthi eleHerentals litshaye eleBulawayo Chiefs nge 1 ka nya ngaseNational Sports Stadium.
Forum