Umndeni kamuyi URahman Gumbo, obekwe ngoMgqibelo emathuneni eLady Stanley Cemetery uthi impilo izakuba lukhuni engasekho. URahman obengumqeqetshi wezenguqu olodumo olukhulu ubhubhele esibhedlela seFrancis Town eBotswana ngemva kokugula isikhatshana mhlaka 10 kuyonale inyanga. Umgcwabo lo ubulamakhulu lamakhulu abantu kuhlanganisela abezenguqu, ingatsha zikahulumende kunye labasekeli balumdlalo.
Unkosikazi kaRahman, uVirginia Gumbo ongumfundisi ebandleni lakhe eBotswana uthi usazama ukuzwisisa ngesehlakalo sokufa komyeni wakhe.
Indodana ka Gumbo eyakuqala uBukhosi ithi iduduzwe yikubona abantu abanengi okwesabekayo bezokhalela uyise.
Omunye umdlali wezenguqu owadlala loRahman Gumbo kuHighlanders lakuqembu lesizwe uAlexander "The Cool Ruler" Maseko uthi kubuhlungu ukubhubha kuka Mr Cash elinye njalo igama lokudlala lika Rahman.
Amazwi kaMaseko agcizelelwa ngu Amin Soma Phiri owaye ngumngane kaRah njalo badlala bonke kuBosso.
Omunye umdlali wenguqu owaba lodumo eqeqetshwa ngumuyi uRaman Gumbo uZenzo Zemura Moyo uthi uRah ubenguyise.
Oqeqetsha kweleBotswana njalo owake wasebenza engumseleli ka Rahman Gumbo uMandla Mpofu uncoma iqhawe lenguqu..
Inhlanganiso yezenguqu emhlabeni wonke jikelele eyeFifa yethule umbiko wenduduzo kumuli yakoGumbo. URosemary Mugadza oweZifa Nomalisation Committee uthi laye udabukile.
UGumbo wadlalela iHighlanders leqembu lesizwe elama Warriors wabuya wabangumholi wamaqembu la njalo usebenze lamaqembu ezenguqu amanengi atshiyeneyo kweleZimbabwe, Malawi, South Africa le Botswana. Ukubhubha kwakhe kudabule umndeni wakoGumbo labantu abanengi. Uhulumende weZimbabwe uncedise kundleko zemfa ka Rahman Gumbo. URush ubeleminyaka engamatshumi ayisithupha njalo ungcwatshe ngelanga azalwa ngalo emangcwabeni eLady Stanley koBulawayo.
Forum