Iqembu labesilisa elimela ilizwe leZimbabwe libe ngutshiki lobhanqa 0 ka 0 leleRwanda emdlalweni wakuqala kumkhankaso owokudinga amaqembu azakuyaphatheka kumncintiswano wezizwe zomhlaba ngomnyaka ka2026.
Limpumela itshiye amaqembu lawa womabili elomklomelo owodwa iqembu ngalinye njalo intathelizindaba yezemidlalo uNash Mkokwayarira uthi yimpumela enhle kakhulu kuqembu leZimbabwe.
“Lokhu kunika ithemba kuqembu leZimbabwe nxa sikhangela indlela abadlale ngayo lamathuba atholwe ngabadlali ababalisa uAdmiral Muskwe kanye loTerrence Dvukamanja awokuthi bebengenelisa ukuhlohla.
Lokhu kunika iqembu leZimbabwe ithemba njengoba belingavunyelwa ukudlala lamanye amazwe esikhathini esedluleyo ukuba lisaselabo abadlali abangalenza liphakame kwezomdlalo wenguqu,” kutsho uMkokwayarira.
Ocubungula ezemidlalo uDumi Dlakama laye utshayele ihlombe iqembu leZimbabwe ngendlela elidlale ngayo ngemva kwesikhathi eside lingancintisi.
“Iqembu lamaWarriors lidlale kuhle nxa sikhangela ukuba ngabadlali inengi labo ngabadlali abakade behlangana okwakuqala ngoba kunzima ukuba umqeqetshi alolonge abafana bedlale ngendlela ayifunayo ngesikhathi esincane uBrito abelabo.
Kuhle ukuba kabazange bahlohlwe njalo bathole umklomelo owodwa loba kuzwisa ubuhlungu ukuba amathuba esiwatholileyo ngabe siwasebenzisile besizanqoba,” kutsho uDlakama.
IZimbabwe leRwanda zikusibaya sikaGroup C ndawonye leBenin, Lesotho, Nigeria kanye leSouth Africa.
Kusenjalo iqembu leEquatorial Guinea linqobe eleNamibia nge 1 ka nya emdlalweni wesibaya sikaGroup H komunye umdlalo odlalwe namhla.
Iqembu elizaphutsha imidlalo lihlezi phezu kwengalane kuzibaya eziyisithupha yilo elizahle lithole ilungelo elokuyadlala kumncintiswano wezizwe zomhlaba ozaqoqwa ngamazwe abalisa eleCanada, Mexico kanye leUnited States ngomnyaka ka2026.
Kweminye imidlalo yesibaya sikaGroup C elandelayo iqembu leNigeria lizemukela eleLesotho kusasa ngoLwesine kuthi ngoMgqibelo iqembu leSouth Africa lizadlala leleBenin.
Iqembu leZimbabwe lizadlala leleNigeria ngeSonto emdlalweni walo wesibili njalo lumdlalo lawo uzaqhutshelwa kweleRwanda njengoba ilizwe leZimbabwe lingela inkundla elungele ukudlalelwa imidlalo yezinga laphezulu.
Forum