Ukubhubha kowayengumdlali njalo engumqheqhetsi olodumo, umnunzana Rahman Gumbo kuthinte inengi kweleBotswana kunye lasekhaya eZimbabwe, elikhala ezimathonisi ngokudlula kwakhe.
UGumbo ubhubhe ngoLwesihlanu kwesinye isibhedlela eFrancistown.
UGumbo odlule emhlabeni eleminyaka engamatshumi amahlanu lasitshiyagalolunye (59) ube esanda kwehlukana leqembu lenguqu eleMorupule Wanderers edolobheni le Palapye.
Kubikwa uGumbo waqaleka ngoLwesine wagijinyiselwa kwesinye isibhedlela eFrancistown lapho adlulele khona.
UGumbo ube ngumqeqetshi ohlinitshwayo kakhulu kweleBotswana lapho athatha isicoco sePremier League leqembu le Township Rollers ngomnyaka ka 2011.
Umnunzana Zacharia Muzadzi owayengumdlali njalo osebenze kakhulu loGumbo engumsekeli wakhe emaqenjini atshiyeneyo, okugoqela ele Wanderers, uthi ukubhubha kukaGumbo kumthinte kakhulu.
“Ngilahlekelwe ngumfowethu, ngubaba, umuntu obe eyikho konke kimi. Sivela khatshana kuqala eZimbabwe.”
Kukanti umqeqetshi kuqembu le Sua Flamingoes, lapho uGumbo owasebenza khona nyakenye, umnunzana Mandla Mpofu uthi uphelelwe ngesehlakalo lesi.
“Ngidabukile njengomqeqetshi ngoba nguye owanginika intshukuntshu ukuthi ngibe ngumqeqetshi. URahman ube engumqeqetshi omkhulu kakhulu.”
OweZimbabwe odlale isikhathi eside kweleBotswana njalo owadlala loGumbo kuqembu lesizwe, umnunzana Fabian Zulu utsho amazwi akhe enduduzo.
“Obe engumngane wam. Nguye owayengivikela kakhulu ngize ngibizwe kuqembu lesizwe lama Warriors. Bonke abangamukela kumaWarriors uWillard Khumalo uMercedes Sibanda, khathesi uGumbo.”
Odlalele iqembu leExtension Gunners elibeliku Botswana Premier League, umnunzana Desire Bafana uthi umuyi uGumbo uyenzele umdlalo wenguqu okunengi kakhulu.
“Uyenzele iBotswana okunengi. Uyakhe abadlali abanengi njalo wathola izicoco ezithile. Inguqu kweleBotswana ilapho ekhona ngenxa yemsebenzi yabantu abafana lo Rush.”
Inhlanganiso ye Botswana Football League itshengise inhlonipho kuGumbo ngokuthi kube lomzizo wokuthula kungaphambi kwemidlalo yonke eye Premier League ekhona ngempelaviki yonale.
Amalungiselelo womgcwabo kade engakabikwa ngesikhathi sokuya emoyeni.
Forum