Iqembu leNgezi Platinum Stars yilo intshantshu zalonyaka kusigaba seCastle Lager Premier Soccer League ngemva kokubuthelela inani lemiklomelo elingeke leneliswe ngamanye amaqembu ancintisana lalo
Iqembu leNgezi Platinum Stars selilemiklomelo engamatshumi ayisithupha lantathu (63) ngemva kolunqoba elikwenze eleSimba Bhora nge 2 ka 1 namhla emini emdlalweni oqhutshelwe enkundleni yeBaobab.
Akula elinye iqembu eselingenelisa ukufikisa lelonani lemiklomelo loba nje kusele imidlalo emibili ukuba isizini yalonyaka ifike komlindi uyacina njengoba iqembu elihlezi endaweni yesibili eleManica Diamonds lingenelisa ukufikisa imiklomelo engamatshumi ayisithupha kuphela nxa linganqoba kumidlalo elisele layo ngemva kokuba namhla libe ngutshiki lobhanqa 0 ka 0 leleCranborne Bullets ngaseNational Sports Stadium.
Komunye umdlalo odlalwe namhla iqembu leSheasham libe ngutshiki lobhanqa 0 ka 0 leZPC Kariba ngaseBata Stadium njalo womabili amaqembu lawa asengozini eyokugunyulwa kusigaba sePSL ekupheleni kwemidlalo yalonyaka.
Kusasa ngeSonto iqembu leChicken Inn lizavakatshela eleDynamos ngaseNational Sports njalo umqeqetshi weqembu leChicken Inn uPrince Matore uthi bazimisele ukuphenduka koBulawayo bephethe yomithathu imiklomelo.
“Siyabahlonipha abeqembu leDynamos kodwa thina sibi sethu kasilaqembu esithi likhulu kumbe lingcono kulathi. Yebo kambe kukhona lapho esinqotshwa khona kumbe sibe ngutshiki lobhanqa loba sinqobe kodwa vele sihlezi sizimisele ukuncintisa ngamandla ethu wonke,” kutsho uMatore.
Eminye imidlalo ezadlalwa kusasa izadlalwa ngokulandelayo; iqembu leYadah lizadibana leleFC Platinum ngaseNational Sports Stadium, iqembu leHwange lizangqikilana leleBlack Rhinos ngaseColliery, iqembu leHighlanders lizadlala leleHerentals College ngaseBarbourfields, iqembu leGreen Fuel lizemukela eleCaps United ngaseGreen Fuel Stadium kuthi iqembu leBulawayo Chiefs lizatshayana leleTriangle United ngaseLuveve.
Kolunye udaba olumayelana lomdlalo wenguqu, iqembu leArenel Movers namhla letheswe inkatha yokuba yilo intshantshu zesigaba seSouthern Region Division One Soccer League.
Umqeqetshi weqembu leArenel uKudzi Mhandire utshayele ihlombe abafana bakhe ngokwenelisa kwabo ukuthola ilungelo elokuyadlala kusigaba sePSL ngomnyaka ozayo.
“Yinto ejabulisayo ukuthi nxa uthe wahlanyela uthi nxa usuvuna uthole izinto ezikhanyayo. Njengemuli yeArenel sithabe kakhulu njalo sithanda ukubonga bonke abakade besisekala abagoqela abasiphathisa ngemali,” kutsho uMhandire.
Lumkhosi uqhutshwe phambilini komdlalo obuphakathi kweqembu leArenel kanye leleAdachi enkundleni yeWhite City namhla emini wona ophele eleArenel linqobe nge 1 ka nya.
Forum