Iqembu leDynamos selifinyelele kufinal yomncintiswano wenkezo yeChibuku Super Cup ngemva kokunqoba eleCaps United 2 ka nya, ngeSonto emini enkundleni yeNational Sports Stadium.
UIssa Sadiki kanye loElton Chikona yibo abahlohlele iqembu leDynamos njalo impumela yanamhlanje itsho ukuba lizadibana leleNgezi Platinum Stars mhla zintathu kunyanga kaMpalakazi kufinal yona ezaqhutshelwa enkundleni yeBaobab.
Iqembu elizaphakamisa isicoco lizathola ilungelo lokuyamela ilizwe leZimbabwe kumncintiswano we CAF Confederations Cup ngomnyaka ozayo.
Kusenjalo iqembu elimela ilizwe leSouth Africa emdlalweni werugby yilo eligcotshwe inkatha eyokuba zintshantshu zomhlaba jikelele ngemva kokunqoba elikwenze eleNew Zealand nge 12 ka 11 ekupheleni kwalumncintiswano obuqhutshelwa elizweni leFrance.
Iqembu leSouth Africa elaziwa kakhulu ngegama elithi Springboks yilo ebelivele liphethe isicoco ngemva kokunqoba elikwenze ngo2019 kumncintiswano oqhutshelwe kweleJapan.
UMongameli welizwe leZimbabwe uEmmerson Mnangangwa ulobe umlayezo enkundleni yobulembu eye X etshayela ihlombe iqembu leSpringboks kanye lomongameli welizwe leSouth Africa uCyril Ramaphosa kodwa lumbiko uchothozwe ngabanye abasebenzisa leyonkundla besithi akalungise isimo sezemidlalo kwelakhe ilizwe.
Kuvele bekuke kwaba lenkulumo ebulenjini phambilini kwe final lapho ezinye izizalwane zelizwe leSouth Africa ebezisithi abantu beZimbabwe bazintandane ngoba sebephitsheka ngokusekela iqembu lakomakhelwane eleSpringboks.
Forum