Basaselethemba elokuba bazaphakamisa isicoco seligi abeqembu leHighlanders loba bengena kumidlalo yalimpelaviki betshiywa ngemiklomelo eyisikhombisa liqembu elihlezi phezu kwengalane eleNgezi Platinum Stars.
Ekhuluma lentathelizindaba zemidlalo phambilini komdlalo wanfeSonto abazawudlala leqembu leBulawayo Chiefs, umsekeli kamqeqetshi weqembu leHighlanders uMadinda Ndlovu uthe iqembu lakhe belidlala ibhola elinathisa amanzi emidlalweni yalo esanda kwedlula.
“Ngeshwa ke asenelisanga ukuthola impumela edala umehleko omkhulu kodwa besidlala ibhola elihle kakhulu. Sizazama ukuba siqhubekele phambili sidlala kuhle sisiyaphambili,” kutsho uNdlovu.
UJoel Luphahla nguye umqeqetshi wabagadli kuqembu leHighlanders njalo uthi kumele bafunde ukucobodisa amaqembu nxa bengavele baqale bona ukuhlohla.
“Iligi ilokhu iqhubekela phambili njalo asikaphoseli ithawulo. Sisebenza kanzima ukuba sivale isikhala njalo silitholile ithuba elokwenza njalo ngoLwesithathu kodwa sayekethisa umdlalo ususiyafika komlindi uyacina lapho esasidlala labo abathole khona umbekwa. Kumele kube yisifundo kithi phambilini komdlalo wethu leBulawayo Chiefs ukuba kumele sihle sitshaye sibhuqe nxa ithuba likhona,” kutsho uLuphahla.
Iqembu leHighlanders lingena kuviki yamatshumi amabili lathoba munwe munye eyomncintiswano lilemiklomelo engamatshumi amane lesikhombisa (47) njalo litshiywa ngemiklomelo eyisikhombisa liqembu elihlezi phezu kwengalane eleNgezi Platinum Stars.
Imidlalo edlalwe namhla kusigaba seCastle Lager Premier Soccer League iphele kanje;
Iqembu leBlack Rhinos libe ngutshiki lobhanqa 1 ka 1 leChicken Inn ngaseBata, iqembu leTriangle libe ngutshiki lobhanqa 1 ka 1 leSimba Bhora ngaseGibbo, iqembu leFC Platinum leGreen Fuel lawo abengutshiki lobhanqa 1 ka 1 eMandava, kuthi iqembu leHerentals linqobe eleSheasham 1 ka nya ngaseNational Sports Stadium.
Kweminye imidlalo yangeSonto iqembu leManica Diamonds lizadlala leleHwange ngaseGibbo, iqembu leZPC Kariba lizadibana leleDynamos ngaseNyamhunga kuthi iqembu leCaps United lizadlala leleCranborne Bullets ngaseNational Sports Stadium kuthi iqembu leNgezi Platinum Stars lizangqikilana leleYadah Stars ngaseBaobab.
Forum